Sua Eselénsia Ministru Petróleu no Rekursu Minerais, Francisco da Costa Monteiro partisipa Kinta-Feira ne’e, iha reuniaun Konsellu Administrasaun Fundu Dezenvolvimentu Kapitál Humanu – CA-FDCH (Sigla iha Portuguéz) ba dala 23, hodi deskuti kona-ba dezenvolvimentu rekursu humanu.
Enkontru ne’e prezide husi sua Eselénsia Prezidente, Konsellu Administrasaun FDCH no Ministru Planeamentu no Investimentu Estratéjiku, Gastão de Sousa no partisipa husi sua Eselénsia Ministru Petróleu no Rekursus Minerais, Francisco da Costa Monteiro, Ministru Justisa, Amandio de Sá Benevides no Sekretáriu Estadu Polítika Formasaun Profissionál no Empregu, Rogério de Araújo, hanesan membru permanente.
Ajenda prinsipál iha reuniaun ne’e, mak atualizasaun taxa ezekusaun OGE 2023 husi fulan Janeiru to’o jullu, tuir programa kada instituisaun nian no aprezenta proposta ne’ebé liñas ministeriais no instituisaun estadu sira submete ona ba Sekretariadu FDCH, hodi enkuadra iha planu OGE 2024.
Durante ne’e, FDCH promove ona formasaun professional ba Timor-oan sira, hodi kompete iha merkadu laboral, formasaun téknika ba funsionáriu no ajente estadu, hodi kontribui di’ak liu-tan iha instituisaun ne’ebé haknaar-an ba, tipu formasaun seluk iha seitór defeza, seguransa no ministériu públiku, oferta bolsa estudu iha nível oi-oin, ba Timor-oan sira, inklui funsionáriu husi instituisaun autónoma ne’ebé tutela iha Ministériu Petróleu no Rekursus Minerais.
Tuir relatóriu husi FDCH husi tinan 2011 to’o 2022, programa formasaun profissional benefisia ona Timor-oan 37. 055, Formasaun téknika hamutuk 37.055, oferta bolus estudu hamutuk 8.710 no formasaun seluk hamutuk 16.497.
Fundu Dezenvolvimentu Kapitál Humanu hari’i liu husi Lei nu. 1/II, 14 Fevereiru 2011, hanesan Fundu Autonomu, atu aposta ba nesesidade kapasitasaun no dezenvolve rekursus umanus nasionais bazeia ba nesesidade nasaun nian.