Responsável sira husi instituisaun tutela iha Ministériu Petróleu no Minerais, Sexta-Feira ne’e simu posse ba mandatu tinan hat, hodi dezenvolve seitór petróleu no minerais, nune’e impulsiona seitór ekonómiku.
Empossadu sira mak hanesan:
– Rui Maria Alves Soares, hanesan Prezidente Konsellu Administrasaun nian ho inerénsia, Prezidente Komisaun Ezekutiva TIMOR GAP, E.P. – Timor Gás & Petróleu, E.P. (“TIMOR GAP”).
– José Manuel Gonçalves, hanesan Prezidente Konsellu Administrasaun nian ho inerénsia Prezidente Komisaun Ezekutiva Murak Rai Timor, E.P.
– Gualdino do Carmo da Silva, hanesan Prezidente Konsellu Diretivu Autoridade Nasionál Petróleu, I.P. (ANP).
– Rafael Danilson Magno de Araújo, hanesan Prezidente Konsellu Diretivu Autoridade Nasionál Minerais, I.P. (ANM).
– Job Brites dos Santos, hanesan Prezidente Konsellu Diretivu Institutu Jeosiénsias Timor-Leste, I.P. (IGTL – Sigla iha lian portugés).
Sua Eselénsia Ministru Petróleu no Rekursus Minerais, Francisco da Costa Monteiro defende importánsia husi seitór rua ne’e ba futuru Timor-Leste, hodi projeta ba kriasaun indústria transformadoras, “Dezenvolvimentu seitór petróleu ho minerais iha futuru, la’os deit extrativa katak, buka, produz, faan ba merkadu, simu osan de’it. Maibé, hakarak dudu seitór ne’e, hodi sai duni seitór transformadora, katak sai indústria ne’ebé bele kontribui ba dezenvolvimentu sósiu ekonómiku iha Timor-Leste” .
Metas prinsipál ne’ebé seitór ne’e atu alkansa mak dezenvolvimentu Greater Sunrise no Sua Eselénsia Ministru Petróleu no Rekursu Minerais tenik katak, projektu ne’e sei estimula ekonomia nasaun nian, resulta kriasaun empregu no envolvimentu ativa entidade oi-oin iha prosesu dezenvolvimentu nasionál.
“Presiza nafatin dudu seitor ida ne’e, iha futuru, nune’e Governu trasa ona politika no programas importante ba seitor ne’e, hanesan dezenvolvimentu kampu Greater Sunrise, dada kadoras mai Timor-Leste. Projektu Tasi Mane mos programa importante ida, Governu kontinua halo promosaun bloku pontensiál sira iha petróleo no gás nian, minerais nian no estudu sientífiku no tekniku ba jeolojia ho nia impaku sira” Fundamenta Eselénsia Ministru.
Sua Eselénsia Primeiru Ministru Interinu no Vise-Primeiru Munistru no Ministru Dezenvolvimentu Rural no Abitasaun Komunitáriu, Mariano Assanami Sabino mos destaka papél desizivu husi instituisaun sira iha setor petróleo no minerais ba ekonomia nasaun nian.
“Tula ba imi nia kabas responsabilidade bo’ot atu oinsa mak ita dezenvolve ita-nia rekursu tasi laran no rai-maran, husi petróleo no minerais, ne’ebé mak kompaña estatal (TIMOR GAP.EP no Murak Rai. EP) sei tau matan ba ida ne’e, regulador rua (ANM.IP no ANP.IP), ne’ebe mak sei fo apoiu tomak, tau-matan, para tuir duni padraun internasionál, ida ne’ebe mak buka (IGTL.IP), buka nafatin, atu hetan tan,” Tenik Sua Eselénsia Vise PM.
Ba Sua Eselénsia Mariano Assanami Sabino, empossadu sira, la’os deit lejitimidade, fo ordem de’it, maibé buka hatene problema sira no forma ekipa forte iha exekusaun tarefas sira.
Governu hili Rui Maria Alves Soares, José Manuel Gonçalves, Gualdino do Carmo da Silva, Rafael Danilson Magno de Araújo no Job Brites dos Santos, tanba rekoñese sira-nia idoneidade, integridade, formasaun akadémika no profisionál, esperiénsia ba kargu superiór sira, kapasidade téknika iha jestaun ba setór espesífiku petróleu, gás no rekursus minerais, koñesimentu polítika no estratéjika ne’ebé relasiona ho setór sira-ne’e.
