Sua Eselénsia Ministru Petróleu no Rekursus Minerais, Francisco da Costa Monteiro no Prezidente Komissaun Funsaun Públika Interinu, Faustino da Silva – Liurai Tasi, sai sasin ba juramentu husi Diretór Jerál foun husi Ministériu Petróleu no Rekursus Minerais, Señor Frederico dos Santos Maia ba períodu 2023 to’o 2027.
Diretór Jerál MPRM ne’e selesionadu liu-hosi prosesu ne’ebé konduz ho rigor, husi Komissaun Funsaun Públika no MPRM, ho konkorrénsia kandidatu na’in walu no rezultadu final, hetan apresiasaun husi órgaun administrasaun públika.
“Selesaun por mérito ne’e prosesu seletivu, importante tebes, atu bele evita politizasaun, no mos bele garante méritokasia iha administrasaun públika, atu nune’e, servidór públiku sira, bele hala’o servisu ida, ho imparsiál, profissionalizmu ne’ebé a’as, ho baze ba méritu, hodi bele presta servisu ida ho kualidade, ba estadu no ba povu,” Tenik Prezidente Komissaun Funsaun Públika Interinu.
Seitór petróleo no rekursus minerais, hanesan motór ida ba prosesu dezenvolvimentu ekonómiku, tanba ne’e, Sua Eselénsia Ministru Francisco Monteiro konsidera katak, Diretor Jerál assume papel sentrál, hodi kordena ho diresaun hotu-hotu, atu konkretiza atividades no programa sira ne’ebé trasa ona.
“Ita implementa hela planu, programa, vizaun, politika barak ne’ebé ita-nia paíz ne’e nesesita hela. Tinan barak ita depende ba dezenvolvimentu kampu mina ida (Bayu Undang), infelizmente kampu ne’e tun dadauk ona, ein termus kontribuisaun ba rendimento estadu, ba ita nia ekonomia” Tenik Sua Eselénsia Ministru Petróleu no Rekursus Minerais.
Governu Konstitusionál da-sia, lideradu husi Sua Eselénsia Primeiru Ministru Kay Rala Xanana Gusmão trasa ona objetivu estratéjiku, hodi alkansa iha tinan lima, hodi bele dezenvolve alternativu sira ne’ebé mak kontinua fo rendimentu di’ak, hodi sustenta nasaun iha futuru.
“Ita iha kna’ar bo’ot ida, la’os de’it kna’ar profissional, maibé kna’ar missionál. Saída de’it mak ita-bele halo tuir ita-nia possibilidade, kapassidade, ita sei halo. Servisu hakaas-an ba missaun bo’ot ne’e, tanba nasaun no povu presiza ida ne’e. Sobrevivénsia hanesan nasaun, estadu, ekonomia, dependente teb-tebes ba seitór petróleu ho mineral ” Fundamenta Sua Eselénsia.
Iha okaziaun ne’e, Sua Eselénsia Ministru Petróleu no Rekursus Minerais mos anúnsia substituisaun temporária ba Direitór Nasionál sira no mos Inspektór ba Gabinete ba Fiskalizasaun no Auditoria, hodi hein selesaun por méritu iha futuru no proposta husi MPRM hetan aseitasaun husi Komissaun Funsaun Públika.
