Sua Eselénsia Ministru Petróleu no Rekursu Minerais, Francisco da Costa Monteiro Segunda-Feira ne’e, simu vizita husi Sua Eselénsia Embaixadór Brunei Darussalam iha Timor-Leste, Wan Hadfi Latif, akompañadu husi Sua Eselénsia, Sekretáriu da-tolu Embaixada nian, Aiman Mohamed.
Durante enkontru, Eselénsia Ministru aprezenta disponibilidade Timor-Leste, atu simu insvestidór husi Brunei Darussalam ne’ebé hakarak investe iha seitór petróleu no minerais.
Embaixadór Wan Hadfi Latif fiar katak, relasaun bilateral ho Timor-Leste sei metin liu-tan no promete atu fasilita interkámbiu Timor-oan sira iha seitór petróleu no minerais, hodi aprende husi Brunei Darussalam.
Diplomata ne’e mos konvida Sua Eselénsia Ministru Petróleu no Rekursu Minerais, Francisco da Costa Monteiro, atu vizita Brunei Darussalam, hanesan nasaun ne’ebé mak riku ho petróleu.
