Sua Eselénsia Ministru Petróleu no Rekursus Minerais, Francisco da Costa Monteiro Tersa-Feira ne’e partisipa iha reuniaun Konsellu Ministru no enkontru ne’ebé lidera husi Sua Eselénsia Primeiru Ministru, hodi aprova proposta Lei Orsamentu Jerál Estadu tinan 2024.
Dotasaun orsamental ba tinan 2024 ho valór totál konsolidadu millaun rihun US$ 1,95 sei aloka Administrasaun Sentrál, RAEOA no Seguransa Sosiál, sein Fundu Rezerva Seguransa Sosiál. Valór ida ne’e inklui dotasaun millaun rihun US$ 1,83 ba administrasaun sentrál no millaun US$ 60 uza ba RAEOA.
Husi kategoria rua ne’e sei millaun US$ 468,8 uza ba saláriu no vensimentu, millaun US$ 386,3 ba bens no servisu, millaun US$ 589,7 ba transferénsias públikas, millaun US$ 34,2 ba kapitál menór no millaun US$ 411 ba kapitál dezenvolvimentu. Orsamentu Seguransa Sosiál, inklui Fundu Rezerva Seguransa Sosiál, iha montante millaun US$ 347,6.
OJE tinan 2024 prevé ho valór millaun US$ 788,2 ba asuntu ekonómiku, millaun US$ 467,1 ba protesaun sosiál, millaun US$ 140,9 ba edukasaun, millaun US$ 66,2 ba saúde no millaun US$ 45,2 ba abitasaun no infraestruturas koletivas.
