𝐄𝐒𝐓𝐀𝐃𝐔 𝐀𝐓𝐑𝐈𝐁𝐔𝐈 𝐊𝐎𝐍𝐃𝐄𝐊𝐎𝐑𝐀𝐒𝐀𝐔𝐍 𝐁𝐀 𝐕𝐄𝐓𝐄𝐑𝐀𝐍𝐔 𝐍𝐎 𝐌𝐀́𝐑𝐓𝐈𝐑 𝟏𝟕𝟖

Sua Eselénsia Ministru Petróleu no Minerais, Francisco da Costa Monteiro iha loron 27 fulan Novembru tinan 2023, partisipa iha serimónia atribuisaun kondekorasaun medalla Ordem Nicolau Lobato, ba Veteranu no Mártir 178 husi Munisípiu Lautem.

Kondekoradu ho tinan dedikasaun 20 – 24 hamutuk na’in 4, tinan dedikasaun 15 – 19 hamutuk na’in 29, na’in ida ho tinan dedikasaun 8 – 14 grau II no 8 – 14 grau III hamutuk 144.

Medalla Kondekorasaun hanesan rekoñesimentu husi estadu no nasaun ba sidadaun ne’ebé dedika sira nia moris tomak, ba prosesu luta libertasaun nasionál.

“Prosesu rekoñesimentu no valorizasaun seidauk konklui, tanba ita Timor-oan ne’ebé fo ita-nia partisipasaun ba funu naruk ida ne’e, la’os oituan ita bele dehan katak, povu tomak mak fo ninia partisipasaun. Governu no estadu atu fo rekoñesimentu no valorizasaun presiza lori tempu naruk, tanba ne’e, balun hetan ona, balun atu hetan no balun sei tempu oin mai” Tenik Sua Eselénsia Vise Prezidente Konsellu Kombatentes Libertasaun Nasionál (CCLN – Sigla iha Portugués), Maijor Jenerál Aluk Descartes.

Sua Eselénsia Ministru Petróleu no Rekursus Minerais apela ba ema hotu, liu-liu joven sira atu banati tuir asaun exemplár husi veteranu no mártir sira, ne’ebé dedika no sakrifika sira nia moris ba luta ukun rasik-an.

“Atu ita rekoñese katak, ita-nia inan-aman sira sai veteranu, ita tenke rekoñese hanesan estadu, hanesan povu no fó honra ba ida ne’e. Ida ne’e simboliza, sai mensajen ba ita sira ne’ebé sei moris hela, liu-liu ba joven sira atu kaer nafatin esprítu sakrifísiu, dedikasaun, servisu ba missaun sira ne’ebé mak dala ruma difísil” tenik Sua Eselénsia Ministru Monteiro.