𝐌𝐏𝐑𝐌 𝐃𝐄𝐅𝐄𝐍𝐃𝐄 𝐈𝐌𝐏𝐎𝐑𝐓𝐀́𝐍𝐒𝐈𝐀 𝐋𝐈́𝐍𝐆𝐔𝐀 𝐈𝐍𝐆𝐋𝐄𝐙𝐀 𝐁𝐀 𝐏𝐑𝐎𝐉𝐄𝐊𝐓𝐔 𝐈𝐇𝐀 𝐊𝐎𝐒𝐓𝐀 𝐒𝐔́𝐋

Sua Eselénsia Ministru Petróleu no Rekursus Minerais, Francisco da Costa Monteiro hamutuk ho Señor Prezidente Autoridade Munisípiu Covalima, Miguel Armanda Cardoso lansa kursu lian ingleza ba komunidade husi Aldeia Sanfuk, Suku Camanasa, Postu Administrativu Suai ne’ebé afeta husi projektu Suai Supply  Base.

Kursu lian inglez hanesan kontinuidade husi programa kursu língua ingleza ne’ebé inisia iha Mandatu Ministru Petróleu no Rekursus Minerais, Alfredo Pires hamutuk ho TIMOR GAP, E.P., hodi empodera komunidade afetadu husi projektu Suai Supply Base, nune’e  bele envolve iha projektu sira ne’ebé sei implementa iha futuru.

Señor Prezidente Autoridade Munisipiu Covalima defende importansia husi kursu lian inglez  no husu ba joven no labarik sira atu kontinua aprende lian inglez, hodi prepara-an ba futuru.

Relasiona ho kursu ne’ebé realiza iha mandatu governu konstitusionál dahat, Señor Prezidente Autoridade Munisípiu Covalima relata katak, benefisiáriu kursu lian ingleza konsege selesionadu hanesan funsionáriu públiku iha Díli, Covalima no mos asessu ba merkadu laborál iha Austrália, Korreia do Sul no seluk tan. 

Sua Eselénsia Ministru Petróleu no Rekursus Minerais, Francisco da Costa Monteiro tenik katak, kursu ne’ebé mak jere husi SOLS 24/7 iha metodolojia própria, hodi tulun joven no labarik sira, atu domina língua ingleza no mós mana’an kompeténsia foun ne’ebé bele fasilita interasaun ho sidadaun no empreza sira ne’ebé sei investe iha Covalima.

Ba Sua Eselénsia Minsitru, Suai Supply Base hanesan projetu nasionál ne’ebé la taka dalan ba partisipasaun husi Covalima oan sira husi Postu Administrativu seluk, hodi mana’an kompeténsia iha domíninu língua ingleza, oportunidade asessu ba formasaun espesializada seluk ne’ebé sei implementa iha futuru no mos atividade empreendedorizmu.

Fatin ba kursu ne’e konstrui ho tali tahan husi komunidade ne’ebé lidera husi veteranu Jorge Alves no  labarik no joven na’in 50 resin mak preparadu ona atu tuir kursu língua ingleza ne’ebé mak sei hanorin husi mestre sira husi SOLS 24/7.