𝐌𝐏𝐑𝐌 𝐀𝐏𝐑𝐄𝐙𝐄𝐍𝐓𝐀 𝐃𝐄𝐒𝐊𝐎𝐁𝐑𝐈𝐌𝐄𝐍𝐓𝐔 𝐇𝐔𝐒𝐈 𝐒𝐄𝐋𝐄𝐒𝐀𝐔𝐍 𝐊𝐎𝐍𝐒𝐄𝐈𝐓𝐔 𝐁𝐀 𝐑𝐄𝐏𝐑𝐄𝐙𝐄𝐍𝐓𝐀𝐍𝐓𝐄 𝐅𝐌𝐈

Dili, 27 February 2025

Sua Eselénsia Ministru Petróleu no Rekursus Minerais, Francisco da Costa Monteiro hasoru malu ho Reprezentante husi Fundu Montetáriu Internasionál, Señor Yan Carriere-Swallow, hodi deskuti kona-ba xavi husi dezenvolvimentu setór oléu, gás no minerál iha Timor-Leste.

Durante enkontru, Sua Eselénsia Ministru Monteiro aprezenta Análize husi Rezultadu Ekonómiku husi Relatóriu ba Konseitu Estudu husi Wood Group, ne’ebé avalia opsaun oi-oin husi dezenvolvimentu kampu Greater Sunrise. Estudu konfirma katak, konseitu hotu ne’ebé aprezenta, inklui Timor-Leste Gás Naturál Liquifeitu (TLGNL) Darwin GNL, Itchtys GNL no instalasaun GNL foun iha Austrália, téknikamente viável hotu, maibé TLGNL destaka hanesan opsaun kompetetiva liu. Esudu konsidera TLGNL hanesan opsaun ne’ebé proporsiona retornu finanseiru di’ak liu ba Greater Sunrise Joint Venture, iha benefísiu ekonómiku global bo’ot liu ba Timor-Leste no impaktu sósiuekonómiku signifikativamente, liu-husi kresimentu husi Produtu Internu Brutu – PIB no kriasaun empregu.

Sua Eselénsia Ministru subliña katak, TLGNL oferese ekonomia forte, garante retornu finanseiru maka’as la’os deit ba estadu, ba mós parseiru husi Sunrise Joint Venture (SJV), no mós kontribui ba dezenvolvimentu nasionál ba tempu naruk. Reitera mos katak, Timor-Leste kontinua empeña hodi avansa projetu ne’e, hanesan forma ida atu maximiza benefísiu ba estadu.

Diskussaun mos foka potensialidade setór mineiru iha diversifikasaun ekonómika. Deskreve esforsu explorasaun ne’ebé la’o dadaun no estratejia husi governu hodi dezenvolve rekursu naturais, hanesan pilar fundamental ida ba kresimentu ekonómiku iha Timor-Leste.