Sua Eselénsia Ministru Petróleu no Rekursus Minerais, Francisco da Costa Monteiro hasoru malu ho delegasaun husi España, lidera husi Sua Eselénsia Embaixador Francisco de Asís Aguilera Aranda, Señor Diretór Jerál ba Norte Amérika, Europa Leste, Azia no Pasífiku, Luis Fonseca Sánchez no Señora Adjunta Diretora Jerál ba Sudeste Azia Pasífiku no Filipinas, Ana Andrés Hernández, hodi explora potensial koolaborasaun iha setór enerjia no infraestruturas
Sua Eselénsia Ministru fó bem-vindu ba delegasaun no hato’o apresiasaun ba interesse husi España ba dezenvolvimentu iha Timor-Leste. Aprezenta mós vizaun jerál kona-ba dependénsia husi Timor-Leste ba kampu Bayu Undan no Kitan durante dékada rua nia laran no subliña foku estratéjiku husik governu ba dezenvolvimentu downstream. Projetu ida ne’e, inklui refinaria no petrokímika ne’ebé assosia iha Projetu Tasi Mane, inisiativa abranjente ne’e, kobre mos intalasaun portuáriu no auto estrada ho objetivu atu atrai investimentu estranjeiru.
Sua Eselénsia Ministru mos destaka poténsial signifikativa husi Kampu Greater Sunrise, hodi subliña ninia kapasidade atu transforma senáriu ekonómiku Timor-Leste nian no temi mos kampu promissór seluk hanesan Bayu Undan, Kelp Deep no Chuditch no kompromissu governu nian hodi prosessa rekursus hirak ne’e iha Timor-Lesre hodi maximiza benefísiu ekonómiku.
Durante reuniaun, Sua Eselénsia Ministru Monteiro mos refere ba estudu independente ne’ebé halo husi Wood Group, hodi avalia dalan oi-oin ba dezenvolvimentu Kampu Greater Sunrise, inklui Timor-Leste (Timor-Leste Liquified Natural Gas – TLNG), Darwin LNG , Ichthys LNG no instalsaun planta LNG foun iha Austrália. Maske konsidera katak, opsaun hirak ne’e teknikamente viável, estudu ne’e identifika katak, TLNG hanesan solusaun atrativa liu, hodi oferese valór ekonómiku ba estadu (Austrália no Timor-Leste) no mos ba parseiru husi Sunrise Joint Venture. Subliña mos katak, TLNG aprezenta oportunidade di’ak ba benefísiu Timor-Leste, hodi garante retornu a’as, kriasaun empregu lokál no kresimentu ekonómiku ne’ebé bo’ot.
Hodi responde aprezentasaun ne’e, Sua Eselénsia Embaixadór, Fonseca Sánchez no Señora Hernánez transmite disponibilidade husi España hodi apoia Timor-Leste, hanesan parseiru dezenvolvimentu. Destaka mos kapasidade husi España iha àrea Enjiñaria, konstrusaun no investimentu no manifesta mos interesse hodi partisipa iha futuru projetu. Delegasaun ne’e mos hatudu vontade husi España hodi fornese apoiu finanseiru no teknolójia, hodi aproveita experiénsia sira ne’ebé atu kontribui di’ak liu tan ba objetivu dezenvolvimentu nasionál.
Parte rua konkorda hodi mantéin liña komunikasaun nakloke, hodi fasilita envolvimentu empreza española sira iha projetu enerjia no infraestruturas iha Timor-Leste. Reuniaun ne’e remata ho kompromissu mútua hodi explora oportunidade koolaborasaun konkreta, hodi promove kresimentu ekonómiku no hametin relasaun bilaterál entre nasaun rua.