Sua Eselénsia Ministru Petróleu no Rekursus Minerais, Francisco da Costa Monteiro hasoru malu ho Sua Eselénsia Embaixadór Kanadá, Jess Dutton, akompaña husi Señora Adjunta Sekretária ba polítiku no Públiku, hodi deskuti poténsial koolaborasaun iha setór oléo, gás no minerál.
Sua Eselénsia Ministru aprezenta prespetiva jerál kona-ba estratejia ba dezenvolvimentu rekursus no subliña dependénsia husi Timor-Leste ba reseitas husi óleu no gás, maibé kontinua buka atu diversifika ekonomia. Destaka mos explorasaun no dezenvolvimentu ne’ebé la’o hela, iha offshore no onshore, hodi reafirma kompromissu hodi dezenvolve infraestruturas fasilitadora ne’ebé mak bele suporta dezenvolvimentu downstream.
Sua Eselénsia mos atualiza ba Embaixadór kona-ba konkluzaun selesaun konseiru husi Wood Group no reitera katak, TLNG kontinua sai opsaun ida viável liu, hodi maximiza retornu ekonómiku no garante benefísiu ba nasaun ba tempu naruk.
Sua Eselénsia Ministru mos aprezenta interesse iha estabelesimentu koolaborasaun ba treinamentuu no kapasitasaun, liu-liu ho parseria ho instituisaun sira iha Kanadá ne’ebé bele fasilita partilla koñesimentu no treinamentu tékniku ba profissionál timor-oan sira. Subliña mos katak, inisiativa ida ne’e importante ba objetivu Timor-Leste nian iha dezenvolvimentu rekursu no industrializasaun.
Sua Eselénsia Embaixadór Dutton rekoñese esforsu husi Timor-Leste ba dezenvolvimentu rekursus naturais no fahe hanoin kona-ba experiénsia husi Kanadá hasoru dezafiu iha extrasaun no explorasaun rekursus. Embaixadór observa exeperiénsia husi Kanadá iha indústria minerais no petróleu no gás, hodi subliña potensiál empreza Kanadá sira, hodi kontribui koñesimentu tékniku iha setór rua ne’e.
Diskussaun ne’e mos ko’alia kona-ba interesse Kanadá hodi apoia dezenvolvimentu minerál iha Timor-Leste, inklui partisipasaun iha plataforma internasionál ba dezenvolvimentu indústria no envolvimentu empreza husi Kanadá. Parte rua konkorda atu manteín diálogu no explora dalan atu hadi’a kooperasaun komersiál no mos liu-husi potensiál estruturas regulatória no mós ba investimentu.
Reuniaun ne’e refirma relasaun bilaterál ne’ebé metin entre Timor-Leste no Kanadá no fahe hamutuk interesse atu promove kooperasaun ne’ebé apoia dezenvolvimentu rekursus no kresimentu ekonómiku.