Governu hahu sosializa no halo konsulta públika ne’e projetu autoestrada entre Zumalai-Natarbora ba akizisaun rai no propriedade ne’ebé sei afeta husi konstrusaun auto estrada ho distánsia kilométru 110, ne’ ebé projetu tendrizasaun lansa ona iha loron 3 fulan Abril tinan ne’e.
Programa ne’ebé realiza Kuarta-Feira ne’ e, iha Postu Administrativu Zumalai, partisipa husi Sua Eselénsia Ministru Petróleu no Minerais, Francisco da Costa Monteiro, Sua Eselénsia Ministru Planeamentu no Investimentu Estratéjiku, Gastão de Sousa no Sua Eselénsia Sekretáriu Estadu hanesan Toponomia no Organizasaun Urbana, Teras Propriedades, Pekuária, Dezenvolvimentu Lokál, reprezentante liñas ministeriais seluk no ekipa veteranu ba interesse nasionál sira, ne’ebé explika papél ka entidade ida iha implementasaun auto estrada Zumalia – Natarbora.
Señor Prezidente Autoridade Munisípiu Covalima, Miguel Cardoso apela ba komunidade afetada atu koolabora ho governu, hodi oferese sira nia rai no propriedade, hodi fó biban ba governu atu konstrui auto estrada husi Zumalai to’o Natarbora, ne’ebé sei kontribui hadi’a futuru Covalima -oan sira nia futuru. Sujere mos ba governu atu kontinua aposta ba konteúdu lokál hodi benefisia komunidade Covalima.
Sua Eselénsia Ministru Planeamentu no Investimentu Estratéjiku, Gastão de Sousa tenik katak, governu konstitusionál da-sia kompromete atu dada kadoras husi kampu Greater Sunrise no governu assume kriasaun infraestruturas bázikas hanesan Suai Supply Base, Auto Estrada no infraestruturas seluk tuir ordem husi Sua Eselénsia Primeiru Ministru Kay Rala Xanana Gusmão katak, tinan 2025 hanesan tinan ba implementasaun.
Tuir Sua Eselénsia Sekretáriu Estadu Terras no Proriedades, Jaime Xavier Lopes, tékniku sira sei halo levantamentu ba rai no propriedade sira, sukat rai, reuniaun ho afetadu sira, hafoin publikasaun ba mapeamentu durante loron 90 nia laran. Maske lakon propriedade, projetu ne’e impulsiona seitor agrikultura no inisiativa empreendedorizmu seluk iha Covalima.
Iha konstrusaun auto estrada seksaun dahuluk no komponente seluk husi Tasi Mane, governu prepara ona kuadru legál no mekanizmu própriu ba libertasaun rai ne’ ebé inklui identifikasaun ba rai, uma no plantasaun, hafoin prosede ba preparasaun baze dadus, publikasaun ne’ ebé permite kontestasaun no rezolusaun iha periódu determinadu no realiza kompensasaun.
Sua Eselénsia Ministru Petróleu no Rekursus Minerais, Francisco da Costa Monteiro tenik katak, auto estrada hanesan komponente importante husi projetu Tasi Mane ne’ebé hanesan planu integradu ida hodi dezenvolve ekonomia, kriasaun empregu liu husi dezenvolvimentu kampu Greater Sunrise. Kontribuisaun husi komunidade nian mak oferese sira nia propriedade, hodi garante projetu auto estrada ne’ ebé sai hanesan pré kondisaun ida atu dada kadoras mai Timor-Leste.
Ba Sua Eselénsia Ministru Monteiro, ho tenderizasaun ne’ ebé dadaun ne’ e la’ o hela iha Komissaun Nasionál Aprovizionamentu (CNA – Sigla iha Portuguéz), iha tempu besik, bele prosede ba kontradu ba dezeñu no konstrusaun auto estrada. Apela nafatin ba komunidade atu kontribui ba identifikasaun rai, propriedade no plantasaun ne’ ebé iha valór ekonómiku ho honestu no evita manipulasaun, hodi governu bele prosesa to’ o iha faze kompensasaun, tanba waihira presta deklarasaun sala, bele sujeita ba prosesu legál.
Tuir aprezentasaun husi TIMOR GAP, E.P. konstrusaun auto estrada sei impaktu diretu liu-husi oferta empregu entre rihun rua to’ o rihun lima no impaktu indiretu ne’ebé ba setór seluk hanesa restraurante, transporte, akomodasaun, oportunidade negósiu, agrikultura, pekuária, peskas, turizmu, kriasaun sidade foun no indústria seluk ne’ ebé sei envolve empreza lokál, inklui ajuda timor-oan sira atu hetan kompeténsia foun.