Prezidente Autoridade Munisípiu Ainaro no komunidade husi Suku Leolima no Foho Ailiku, Postu Administrativu Hatu Udo deklara prontidaun atu apoia ekipa téknika ba levantamentu rai no propriedade iha Suku Leolima no Foho Ailiku, Postu Administrativu Hatu Udo, hodi bele fasilita implementasaun projetu auto estrada Zumalai – Natarbora.
Ba Señora Manuela Carmo Bucar, povu Ainaro presiza tebes dezenvolvimentu no ksolok tebes tanba mega projetu auto estrada bele liu-husi àrea Hatu Udo, hodi fiar katak, sei estimula agrikultura, peskas no apoia prosesu dezenvolvimentu nasional iha futuru.
Iha kontinuasaun sosializaun no konsulta públika ba projetu autoestrada entre Zumalai-Natarbora ba akizisaun rai no propriedade ne’ebé realiza Kinta-Feira ne’e, komunidade Hatu Udo prontu oferese rai no propriedade ba estadu no aseita padraun ba indemizasaun ne’ebé aplika ona ba komunidade afetadu husi auto estrada seksaun dahuluk iha Covalima no Suai Supply Base, tanba fiar katak, auto estrada sei hadi’a sira nia padraun moris.
Sua Eselénsia Ministru Planeamentu no Investimentu Estratéjiku, Gastão de Sousa tenik katak, implementasaun auto estrada, manifesta kompromissu governu nian, atu lori dezenvolvimentu ba povu ne’ebé kontribui maka’as ba edifikasaun estadu Timor-Leste, maibé prosessu dezenvolvimentu rekere nafatin kontribuisaun sidadaun nian, hodi fó benefísiu ba nasaun no ba futura jerasaun no ignora diverjénsia sira. Setór petróleu estratéjiku ba Timor-Leste, la’os de’it ba àrea ne’ebé pertense ba Tasi Mane, tanba sei fó retornu ba estadu, hodi transforma Timor-Leste ba nasaun rendimentu mediu altu, hanesan temi iha Planu Estratéjiku Dezenvolvimentu Nasionál – PEDN 2011 – 2030.
Ba Sua Eselénsia Sekretariu Estradus Terras no Propriedades, Jaime Xavier, konstrusaun auto estrada sei lori valór akresentadu ba ekonomia iha Postu Administrativu Hatu Udo no ema barak mak interesse atu investe, tanba ne’e exige ba ema hotu atu kontribui. Husu honestidade husi komunidade iha prosesu sukat rai, hodi realiza prosesu kompensasaun no husu mos atu jere osan no halo investimentu hanesan negósiu ka hari’i uma, waihira governu fó ona kompensasaun.
Ba Sua Eselénsia Ministru Francisco Monteiro, auto estrada hanesan komponente importante ida husi projetu Tasi Mane, inklui mos Suai Supply Base, ne’ebé sei sai baze apoiu ba indústria petrolíferas no sei fasilita importasaun no exporasaun sasan, hodi mobiliza ba indústria petrolífera iha Natarbora ne’ebé sei liu-husi auto estrada Suai ba Natarbora. Obra ne’e sei assegura polítika dada kadoras husi Kampu Greater Sunrise mai Timor-Leste no kontribuisaun komunidade liu-husi oferese rai no propridade ba investimentu, reprezenta kontribuisaun vitál ba prioridade nasionál.
Auto estrada ho distánsia kolométru 76 ne’ebé dadaun ne’e iha hela faze tenderizasaun ba konstrusaun ne’e konstitui husi seksaun tolu, hanesan Zumalai to’o Betanu ho totál kilometru 25 resin, Betanu ba Uma Berloek ho distánsia kilométru 25 resin, Uma Berloek ho Natabora ho distánsia 25 kilometru resin. Husi projetu auto estrada no indústria mineral seluk sei empreza joven sira no ajuda atu mana’an kompeténsia foun, promove konteúdu lokal no efeitu ba setór seluk.