Sua Eselénsia Ministru Petróleu no Rekursus Minerais, Francisco da Costa Monteiro hasoru malu ho Sua Eselénsia Embaixadór Repúblika Indonézia, Okto Dorinus Manik, hodi deskuti atuál dezenvolvimentu husi setór petróleu no minerais, no mos explora oportunidade atu haforsa kooperasaun entre Timor-Leste no Indonézia.
Sua Eselénsia Ministru aprezenta atualizasaun kona-ba dezenvolvimentu husi Kampu Greater Sunrise, inklui deskobrimentu husi estudu independente Selesaun Konseitu ne’ebé realiza husi Wood Group. Destaka katak, opsaun ba dezenvolvimentu hotu ne’ebé avalia hanesan Timor-Leste LNG (TLNG), Darqin LNG, Ichtys LNG no instalasaun foun ida iha Austrália, téknikamente viável. Maibé, estudu ne’e konklui katak, TLNG hanesan opsaun viável liu, komersialmete no ekonómikamente vantajoza ba estadu, no mós ba Sunrise Join Venture.
Sua Eselénsia mos aprezenta panorama kona-ba esforsu atuál iha setór minerais no mos intensaun governu nian hodi promove explorasaun no dezenvolvimentu ho dalan ne’ebé bele garante responsabilidade ambiental no oferese benefísiu notável ba komunidade lokál. Sua Eselénsia mos saúda diskussaun kontínua ho Indonezia kona-ba oportunidade koolaborasaun no partilla koñesimentu.