𝐌𝐏𝐑𝐌 𝐍𝐎 𝐓𝐈𝐌𝐎𝐑 𝐆𝐀𝐏, 𝐄.𝐏., 𝐀𝐒𝐒𝐈𝐍𝐀 𝐀𝐊𝐎𝐑𝐃𝐔 𝐇𝐎 𝐒𝐓𝐑𝐄𝐀𝐌𝐓𝐄𝐂 𝐇𝐔𝐒𝐈 𝐒𝐔𝐈𝐒𝐀 𝐁𝐀 𝐃𝐄𝐙𝐄𝐍̃𝐔 𝐆𝐀𝐙𝐎𝐃𝐔𝐓𝐔 𝐍𝐎 𝐊𝐑𝐈𝐀𝐒𝐀𝐔𝐍 𝐄𝐌𝐏𝐑𝐄𝐙𝐀 𝐏𝐔́𝐁𝐋𝐈𝐊𝐀-𝐏𝐑𝐈𝐕𝐀𝐃𝐀

Ministériu Petróleu no Rekursus Minerais no TIMOR GAP, E.P., assina akordu kooperasaun ho empreza StreamTec Solution AG husi Suisa ba dezeñu pipeline ka kadoras no kriasaun empreza parseira públiku-privada ho naran STREAMTEC Timor-Leste Pipeline, CO.

StreamTec Timor-Leste Pipeline, CO ne’ebé TIMOR GAP, E.P., sei iha partisipasaun 70 no StreamTec Solution AG ho partisipasaun porsentu 30, mak sei responsabiliza ba promosaun, operasaun no manutensaun ba pipeline highway (rede kadoras ho distánsia do’ok hodi transporta gás naturál) husi àrea besik Bayu Undan ba Natarbora. Konseitu kriasaun empreza StreamTec Timor-Leste Pipeline, CO hanesan estratejia lójika, kriativu no komersial ne’ebé sei estimula dezenvolvimentu iha Kosta Súl, Timor-Leste nian, tanba permite kanalizasaun gás husi Tasi Timor ba Natarbora.

Além de ne’e, StreamTec Timor-Leste Pipeline mos projeta envolvimentu iha projetu Greater Sunrise, waihira hetan konsertasaun ho empreza joint venture ho governu australianu no governu Timorense, iha prosesu negosiasaun, hodi detemina nesesidade envolvimementu husi StreamTec Timor-Leste Pipeline, CO iha projektu Greater Sunrise.

Sua Eselénsia Ministru Petróleu no Rekursus Minerais, Francisco da Costa Monteiro subliña redusaun husi produsaun iha kampu Bayu Undan no analiza possibilidade atu taka Bayu Undan relasiona ho kontransjimentu komersiál iha Austrália, hodi la possibilita exportasaun gás ba Austrália, tanba ne’e sei dezenvolve gazodutu husi rezerva existente, hodi kontinua halo investimentu ho kombinasaun ho kampu Chuditch, nune’e bele apoia dezenvolimentu Kosta Súl.

Kona-ba dezeñu ba pipeline, Sua Eselénsia Ministru tenik katak, bele finaliza entre tinan ida ho balun to’o tinan rua no iha prosesu preparasaun dezeñu ba kadoras, sei iha estudu konjuntu ne’ebé sei envolve ativamente timor-oan sira, hodi manaan abilidade téknika ba operasaun no manutensaun kadoras iha futuru.

Ba prosesu instalsaun, sei implementa iha kurtu prazu nia laran no reprezentante StreamTec, George Nowack aprezenta esperiénsia markante empreza nian iha instalasaun kadoras iha Nord Stream pipeline system entre Alemaña ho Russia, ne’ebé prevé finaliza iha tinan neen, maibé empreza konklui iha tinan rua nia laran.

Antes ne’e, empreza STREAMTEC envolve iha estudu kona-ba kadoras husi Greater Sunrise mai Timor-Leste no governu hakarak hametin parseria ba kontinuasaun husi dezenvolvimente ba Bayu Undan no projeta ba dezenvolvimentu Greater Sunrise.