Díli, 5 Juñu 2025
Sua Exelénsia Ministru Petróleu no Rekursu Minerais, Francisco da Costa Monteiro simu no realiza enkontru kortezia ho Sua Eselénsia Embaixadór Japaun iha Timor-Leste, Tetsuya Kimura iha Dili. Embaixadór akompaña husi Segunda Sekretária Embaixada Japaun, Señora Kana Murozono.
Enkontru ne’e hanesan oportunidade atu deskuti àrea kooperasaun enerjétika bilaterál no fahe hanoin antes Sua Eselénsia Ministru Monteiro vizita ba Tokyo iha finál fulan ida ne’e, hodi partisipa iha Konferénsia Produtór – Konsumidór Gás Naturál Liquifeitu – GNL 2025, ne’ebé Japaun sai uma na’in hamutuk husi Ministériu Ekonomia, Komérsiu no Indústria Japaun nian ho Ajénsia Enerjia Internasionál (IEA – Sigla iha Inglez).
Sua Eselénsia Ministru destaka relasaun existente entre Timor-Leste no Japaun no destaka Japaun hanesan kompradór konfiável no valorizadu ba gás naturál husi Tasi Timor nian iha projetu sira liu-ba.
Sua Eselénsia Embaixadór Japaun manifesta interesse atu kontinua koolabora ho Timor-Leste iha setór enerjétiku no simu ho ksolok vizita ne’ebé sei realiza, hanesan marku importante hodi hametin diálogu no envolvimentu komersiál entre nasaun rua.