Díli, 10 Juñu 2025
Sua Eselénsia Ministru Petróleu no Rekursus Minerais, Francisco da Costa Monteiro hasoru malu ho exekutivu husi Santos Ltd., inklui Vise Prezidente Exekutivu Santos ba Austrália Osidentál, Norte no Timor-Leste, señor Vince Santostefano, Vise Prezidente Exekutivu ba Prosesamentu Midstream no CCS (Kaptura no Armajenamentu Karbonu), señor Alan Stuart-Grant, Vise Prezidente ba Norte Austrália no Solusaun Enerjétika Timor-Leste, Señor Richard Hinkley no Country Manager, señor José Lobato, hodi deskuti futuru husi Bayu Undan no oportunidade emerjente ba kaptura no armajenamentu Karbonu – CCS.
Enkontru ne’e foka ba prosesu estudu ligadu ho CCS iha Bayu Undan ne’ebé governu simu atualizasaun no reitera governu disponibilidade ba solusaun inovadora, ne’ebé loke ba valores tempu naruk, husi infraestruturas existente, aliña ho objetivu tranzisaun enerjétika global.
MPRM no Santos explora mos viabilidade téknika atu kombina ho extrasaun gás ne’ebé restu husi utilizasaun Bayu Undan ba Kaptura no Armajenamentu Karbonu – CCS, inklui sinerjia potensiál husi kampu seluk hanesan Chudich. Sua Eselénsia mos aponta nesesidade planu ba oin ne’ebé konsidera mos dalan ba dezenvolvimentu paralelu, hodi permite produsaun no armajenamentu konkorrente, waihira viabilidade téknika no kumprimentu regulatória garante ona.
Sua Eselénsia Ministru Monteiro subliña mos importánsia atu mantein tranzisaun kampu Bayu Undan no konvida Santos iha koolaborasaun ho parseiru sira empreza Joint Venture no TIMOR GAP, E.P., ho dezenvolve liu-tan proposta ida ne’ebé inklui rekuperasaun, maximizasaun husi rezerva restu no kolokasaun CCS. Proposta ne’e sei sai baze ba diálogu no avaliasaun ministériu iha futuru.
Enkontru ne’e kobre aspetu klean kona-ba parseria, inklui dezenvolvimentu abilidade, operasaun remota no papel Timor-Leste nia iha jestaun rekursus tasi. Sua Eselénsia Ministru reitera ninia apoiu ba solusaun ne’ebé bele maximiza partisipasaun iha rai-laran no benefísiu sustentável ba tempu naruk.