Covalima, 26 Juñu 2025
Sua Eselénsia Ministru Petróleu no Minerais, Francisco da Costa Monteiro aprezenta ba auditór no inspetór sira husi administrasaun estadu kona-ba potensialidade minarai no obras estratéjiku sira ne’ebé sai hanesan komponente importante husi projetu Suai Supply Base.
Lokál ba vizita guiada dahuluk mak Matan Suai Loro, hodi Sua Eselénsia Ministru Monteiro aprezenta auditór no inspetór sira ne’ebé inklui husi Tribunal das Contas, Komissaun Funsaun Públika (CFP – Sigla iha Portuguéz), Ajénsia Dezenvolvimentu Nasionál – CNA, Komisaun Nasionál Aprovizionamentu (CNA – sigla iha Portuguéz) kona-ba potensialidade rekursu petrolíferu husi prespetiva téknika no jeolójika.
Durante prosesu konstrusaun aeroportu Internasionál Komandante ein Xefe Kay Rala Xanana Gusmão Covalima, sidadaun balun afetadu husi projetu ne’ e no governu hari’i mos zona rezidénsia ba sidadaun sira, ho utilizasaun materiál lokál no komunidade kontente tebes ho projetu Kosta Súl ne’ebé iha efeitu multiplikadora ba sidadaun.
Vizita guiada ne’e taka ho observasaun ba Aeroportu Covalima ne’ebé iha tempu besik, sei sai hanesan baze operasaun ba kompaña Weststar Gap Aviation (Konsórsiu entre TIMOR GAP, E.P.no Weststar Aviation husi Malazia) ho kompaña Santos ba servisu dezmantelamentu husi Kampu Bayu Undan no mos servisu nesesáriu balun.
Inspetór no auditór sira hetan informasaun sufisiente kona-ba futuru setór petróleu no minerais, infraestrutura iha Kosta Súl ho nia efeitu sira no esforsu atu dezenvolve gazodutu mai Timor-Leste, liu-husi akumulasaun husi Kampu Bayu Undan ne’ebé sei iha rezerva, Chudich, inklui husi Greater Sunrise no rekursu petrolíferu husi rai maran.