𝐀𝐍𝐏, 𝐈.𝐏. 𝐊𝐎𝐌𝐏𝐑𝐎𝐌𝐄𝐓𝐈𝐃𝐔 𝐀𝐓𝐔 𝐃𝐄𝐙𝐄𝐍𝐕𝐎𝐋𝐕𝐄 𝐑𝐄𝐊𝐔𝐑𝐒𝐔 𝐏𝐄𝐓𝐑𝐎𝐋𝐈́𝐅𝐄𝐑𝐔

Autoridade Nasionál Petróleu – ANP, I.P. selebra existénsia ba dala 17 no kompromete atu servisu atu administra Timor-Leste nia rekursu petrolíferu, hodi kontribui ba prosesu dezenvolvimentu nasional.

Iha aniversáriu existénsia ANP, I.P. Señor Prezidente Autoridade Nasional Petróleu, ANP, I.P, Gualdino do Carmo da Silva promete atu dezenvolve liu-tan servisu, iha regulasaun ba atividade petrolíferas, peskiza ba potensialidade rekursu iha onshore no offshore, aprovasaun, auditória, inspeksaun, promosaun ba dezenvolvimentu no regulasaun, inkliui mos atividade importasaun kombustível.

Susesu notável ida husi ANP, I.P., durante tinan 17 mak envolvimentu iha kollesaun reseitas husi Fundu Petrolíferu ne’ebé iha tinan 2008 ho valór billaun rua no dadaun ne’e iha billaun 18. Ba oin, tuir Señor Prezidente ANP, I.P., sei servisu maka’as hodi dezenvolve indústria petrolífera, hodi substitui kampu Bayu Undan ne’e hakotu ona produsaun.

Relasiona ho atividade downstream, Autoridade Nasional Petróleu rejista estasaun kombustível 80 no prevé existe estasaun kombustível hamutuk atus ida to’o final tinan 2025 no existénsia empreza hirak ne’e garante husi kuadru legál existente no klima di’ak ba investimentu.

Dadaun ne’e, ANP, I.P sai autoridade únika ba jestaun atividade petrolíferas iha àrea konjunta hodi naran governu Timor-Leste no Austrália, inklui sai autoridade designada ba jestaun Kampu Greater Sunrise.

Sua Eselénsia Ministru Petróleu no Rekursus Minerais, Francisco da Costa Monteiro rekorda komplexidade no rezisténsia husi parte balun, iha inísiu estabelesimentu ANP, hodi substitui Timor Sea designated Authority (TSDA), hanesan instituisaun ho natureza internasionál ne’ebé reprezenta Governu Timor-Leste no Austrália, hodi administra Joint Petroleum Development Area (JPDA) iha Tasi Timor.

Tuir Sua Eselénsia Ministru Monteiro, servisu ANP durante ne’e satisfatóriu iha exekusaun planu no polítika, no mós hetan konfiansa husi Austrália, Timor-Leste no kompaña petrolífera sira, no husu atu kontinua dezenvolve, atu mana’an konfiansa, hodi implementa servisu sira tuir planu no programas existente, hodi dezenvolve rekursu petrolíferu no gás.

Aniversáriu existénsia ANP, I.P. koínside ho no aniversáriu governasaun IX governu Konstitusionál ba tinan daruak no Sua Eselensia Primeiru Ministru Interinu, Mariano Assanami Sabino fó orientasaun ba ANP atu kontinua esforsu maka’as hodi dezenvolve rekursu petrolíferu no gás husi kampu seluk, além de projeta ba dezenvolvimentu Greater Sunrise, hodi kontinua hamoris ekonomia nasaun nian.