𝐈𝐗 𝐆𝐎𝐕𝐄𝐑𝐍𝐔 𝐊𝐎𝐍𝐒𝐓𝐈𝐓𝐔𝐒𝐈𝐎𝐍𝐀́𝐋 𝐊𝐎𝐌𝐏𝐑𝐎𝐌𝐄𝐓𝐄 𝐃𝐔𝐃𝐔 𝐏𝐑𝐎𝐒𝐄𝐒𝐔 𝐃𝐄𝐙𝐄𝐍𝐕𝐎𝐋𝐕𝐈𝐌𝐄𝐍𝐓𝐔 𝐍𝐀𝐒𝐈𝐎𝐍𝐀́𝐋

Governu Konstitusionál ne’ebé Xefia husi Primeiru Ministru Kay Rala Xanana Gusmão kompleta ona tinan 2 no kompromete nafatin atu dudu prosesu dezenvolvimentu nasionál no hadi’a padraun moris sidadaun nian.

Iha selebrasaun missa ba governasaun tinan rua ne’ebé partisipa husi Sua Eselénsia Ministru Petróleu no Rekursus Minerais, Francisco da Costa Monteiro hamutuk ho membru governu hotu, Sua Eselénsia Primeiru Ministru Interinu, Mariano Assanami Sabino, elojia servisu dezempeñu servisu durante tinan rua iha setór oi-oin.

Ho alkansu durante tinan rua nia laran, Vise Primeiru Ministru Assanami Sabino ne’ebé assume interinamente pasta Xefe Governu, ho auzénsia paíz Sua Eselénsia Primeiru Ministru Kay Rala Xanana Gusmão, apela ba kargu xefia no entidade hotu atu hametin koolaborasaun hodi dudu prosesu dezenvolvimentu nasionál.

Hafoin selebrasaun missa ne’ebé prezide husi Padre Ângelo Salsinha, Sua Eselénsia Ministru Monteiro akompaña Sua Eselénsia Primeiru Ministru Interinu tau aifuan iha Semitériu Santa Cruz, hodi fó honra no glória ba heroi no mártir libertasaun nasionál.

Governu Konstitusionál da-sia simu posse husi Sua Eselénsia Prezidente Repúblika, José Ramos-Horta iha loron 1 fulan Jullu tinan 2023 iha Palásiu Prezidensiál ho foku prinsipál hanesan, reafirmasaun estadu direitu demokrátiku, dezenvolvimentu kapitál sosiál, dezenvolvimentu infraestruturas, konsolidasaun governativa no boa governasaun no kombate korrupsaun.

Ministériu Petróleu no Rekursus Minerais ho entidade tutela hanesan ANP, I.P., TIMOR GAP, E.P., IGTL, I.P., ANM, I.P. no MURAK RAI TIMOR, E.P., hola parte iha komponente iha husi dezenvolvimentu ekonómiku, atu jere no uzu rekursus naturais (petróleu no minerais) hodi hari’i nasaun no proporsiona progressu no moris di’ak ba povu tomak, liu-hosi investimentu estratéjika ne’ebé iha efeitu multiplikadora ba dezenvolvimentu nasionál.