Parlamentu Nasional, 19 Novembru 2025
Proposta Orsamentu Jerál Estadu tinan 2026 husi Ministériu Petróleu no Rekursus Minerais ho valór dólar amerikanu liu milaun 128, aprovadu iha espesialidade ho votus afavór 42 kontra 0 no abstensaun 23.
Proposta orsamentu ne’e atu finansia programa sira hanesan; funsionamentu no dezenvolvimentu institusionál, dezenvolvimentu kampu Greater Sunrise no assegura dada kadoras mai Timor-leste, dezenvolve polítika no prátika di’ak iha indústria no assegura partisipasaun timor-oan iha setór, explora, investiga no dezenvolve rekursus petrolíferus, minerais no jeolójikus.
Sua Eselénsia Ministru Petróleu no Rekursus Minerais aprezenta katak, despeza prevista hamutuk dólar amerikanu millaun 80 resin ba projetu Tasi Mane klassifikadu hanesan investimentu nesesáriu, ne’ebé sei rezulta retornu finanseiru no benefísiu sósiu ekonómiku seluk. Husi valór ne’e, Konsellu Ministru aprova iha inísiu fulan Novembru dezpeza ho montante dólar amerikanu liu millaun 16, ba implementasaun programa A13, ne’ebé inklui dezenvolvimentu hosi kampu gás Greater Sunrise no realizasaun estudu no inisiativa nesesáriu sira, hodi garante kadoras mai Timor-Leste.
Relasiona ho prosesu negosiasaun ba Greater Sunrise, Sua Eselénsia Ministru Monteiro tenik katak, negosiasuan iha nível joint venture la’o hela, inklui negosiasaun intensa ho Austrália hodi finaliza Kódigu Mineiru ba Petróleu, Rejime Taxa no Kontratu Fahe Produsaun no mos preparativu ligadu ho projetu Tasi Mane, iha onhshore no offshore, hodi garante realizasaun projetu estratéjiku ne’e iha futuru.
Inisiativa seluk ne’ebé governu kontinua halo hodi hein produsaun husi Kampu Greater Sunrise mak hanesan, produsaun iha rai-maran (Pualaka, Suai no seluk tan), dezenvolve kampu Bayu Undan, Chudich, Kelp Deep no Jahal Kuda Tasi no iha setór minerais, Governu atribui ona lisensa ba prospesaun no peskiza hamutuk 51, hodi autoriza empreza sira halo investimentu no deskobre potensialidade rikusoin iha rai-okos no abertura tenderizasaun iha setór petróleu no minerais iha fulan Novembru nia laran no mos insiativa seluk ne’ebé kontribui reseitas ba estadu no kria empregu ba timor-oan sira.
