𝐌𝐏𝐑𝐌 𝐍𝐎 𝐀𝐀𝐇𝐀 𝐄𝐃𝐔𝐂𝐀𝐓𝐈𝐎𝐍 𝐊𝐎𝐍𝐊𝐋𝐔𝐈 𝐇𝐎 𝐒𝐔𝐒𝐄𝐒𝐔 𝐅𝐎𝐑𝐌𝐀𝐒𝐀𝐔𝐍 𝐋𝐈𝐀𝐍 𝐈𝐍𝐆𝐋𝐄́𝐙 𝐅𝐀𝐙𝐄 𝐃𝐀𝐇𝐔𝐋𝐔𝐊 𝐈𝐇𝐀 𝐂𝐎𝐕𝐀𝐋𝐈𝐌𝐀

𝐶𝑜𝑣𝑎𝑙𝑖𝑚𝑎, 06 𝐽𝑎𝑛𝑒𝑖𝑟𝑢 2026

Ministériu Petróleu no Rekursus Minerais – MPRM no AHHA Education konklui ho susesu formasaun lian ingléz nível I ba faze dahuluk, ba Covalima-oan na’in 70. Iha serimonia atribuisaun sertifikadu, formandu na’in rua aprezenta ho satisfatória, diskursu ho lian inglez kona-ba moris no respeita inan aman.

Ba oin señor Director AHHA Education anunsia katak, sei reforsa destakamentu formador iha Covalima, hodi aposta ba kursu lian matemátika no seluk tan, hodi aumenta abilidade joven sira, hodi kompete iha merkadu laboral.

Señor Filomeno Cardoso hanesan reprezentante Prezidente Autoridade Munisipiu Covalima fiar katak, formandu sira sei iha domíniu ba lian ingléz, hodi atende ba tarefa sira ligadu ho adezaun Timor-Leste ba ASEAN, desentralizasaun administrativa no oportunidade sira ne’ebé assosia iha projetu Tasi Mane.

Faze inisiál kursu lian inglez inagura iha fulan Fevereiru 2025 iha Samfuk, suku Kamansa, maibé lia na’in no autoridade Munisípiu Covalima husu atu expanda tan kursu iha área seluk ne’ebé afeta husi projetu Suai Supply Base no komponente seluk husi projetu Tasi Mane.

Sua Eselénsia Ministru Petróleu no Rekursus Minerais, Francisco da Costa Monteiro elojia AHHA Education ne’ebé introduz ho susesu métodu aprendisajen apropriadu ba formandu sira, hodi domina lian inglez.

Ho alkansu ne’e, Ministériu Petróleu no Rekursus Minerais – MPRM sei intensifika apoiu formasaun lian ingléz no expanda estabelesimentu sentru formasaun sira, tuir metas governu nian katak, to’o 2028, sidadaun ho kapasitadu iha téknika no komunikasaun hamutuk atus lima, hodi enkuadra iha projetu Tasi Mane.

Kursu lian inglez inisia iha mandatu Governu Konstitusional da-hat, waihira Sua Eselensia, Alfredo pires hanesan Ministru Petroleu no Rekursus Minerais no benefisiáriu husi programa nee, hetan ona servisu iha ajénsia governu, privadu no iha estranjeiru.