Díli, 17 Marsu 2026
Governu husu ba públiku atu labele pániku, stock kombústivel disponível ba nesesidade konsumu enerjétiku, ba fulan rua mai.
Liu-husi konferénsia imprensa iha Tersa-Feira ne’e, Sua Eselénsia Ministru Petróleu no Rekursus Minerais, Francisco da Costa Monteiro rekoñese katak, presu kombústivel rejista aumentu oituan, relasiona ho funu intensu iha Médiu Oriente no interrupsaun exportasaun mina kondensada iha liu-husi Estreitu Hormuz, hodi fornese ba refinaria sira iha Singapura, Tailándia, Korreia do Súl no Xina.
Dadaun ne’e, Governu halo koordenasaun intensiva ho TIMOR GAP, E.P., ANP,I.P no kompaña importadora hanesan Pertamina Indonesia, Esperansa Timor-Oan – ETO no seluk tan, hodi atualiza papél kruxiál kada entidade assune, atu atende possível senáriu iha futuru. Empreza importadora konfirma mos aumentu lijeiru ba stock ne’ebé mak foin tama, tuir situasaun ekonómika Timor-Leste nian, maibé la iha indikasaun katak, empreza sira aproveita krize ne’e hodi manipula presu.
Tuir Sua Eselénsia Ministru Monteiro, governu mos halo koordenasaun interministerial hodi hola media nessesária no apropriada, atu estabiliza presu kombústivel, nune’e bele hamenus impaktu ba setór ekonómiku, waihira kontinua akontese flutuasaun presu. Governu prevé define iha tempu besik, plafon orsamental ne’ebé mak bele permite estabilizasaun ba presu kombústivel, tuir análize detallu ba situasaun ekonomia iha rai laran.
Maske flutuasaun presu kombústivel ne’e dependente ba evolusaun husi konflitu husi jeopolitika, Sua Eselénsia Ministru Monteiro prevé katak, sei la akontese xoke drástika ba seguransa enerjétika, relasiona ho redusaun ba restrisaun ne’ebé aplika husi Estadus Unidus Amérika ba Russia, hodi possibilita, venda mina no gás ba refinaria sira iha Mundu, hodi reduz presu ba kombústivel.
Husi implikasaun krize enerjetika ne’e, Governu Timor-Leste hakarak implementa industrializasaun ba setór petrolíferu, liu-husi estabelesimentu ba Planta Gás Naturál Liquifeiru – GNL, refinaria no petrokímika iha Natarbora, hodi garante konsumu enerjetiku nasionál, atu mitiga possivél impaktu ba setór enerjétiku iha futuru.