Ossu – Viqueque, 23 Abril 2026
Empreza Tivan Limited sei kontinua servisu ne’ebé empreza Australiana Beacon Minerals halo durante tinan 2, hodi halo prospesaun no peskiza ba minerais metáliku, liu-liu osan mean, Manganese no osan mutin, iha área konsesaun 50 Km2 ne’ebé pertense ba Postu Administrativu Venilale, Munisípiu Baucau no Munisípiu Viqueque.
Governu atribui direitu mineiru ba empreza Beacon Minerals iha fulan Abril tinan 2024, hodi halo prospesaun no peskiza tuir kontratu ho governu hodi halo mapeamentu jeolójiku no jeofíziku, maibé labele kontinua no aprezenta ba governu katak, iha dezafiu interna empreza nian no empreza Tivan Limited mak manifesta ninia interesse atu kontinua projetu ne’e, hafoin avalia dadus husi Beacon Minerals.
Iha serimónia atribuisaun lisensa direitu mineiru iha Kinta-Feira ne’e iha Ossu, Señor Prezidente Autoridade Nasionál Minerais, ANM, I.P., Rafael Magno de Araújo tenik katak, Beacon Minerals sei kontinua servisu ne’ebé implementa ona, hodi deskobre rezerva riku-soin, liu-husi propesaun no peskiza no waihira iha indikasaun ba potensialidade mak sei halo estudu detallu, hodi hatene kualidade no kuantidade rikusoin no projeta ba explorasaun, prosesamentu, komersializasaun no revitalisaun lokal.
Sua Eselénsia Ministru Petróleu no Rekursus Minerais, Francisco da Costa Monteiro, destaka alkansu prinsipál husi empreza Tivan Limited iha atividade prospesaun no peskiza iha Turiscai – Manufahi, hodi anúnsia iha Austrália deskobrimentu osan mean. Maske iha susbstituisaun repsonsanbilidade, governu fiar katak, Tivan LDA iha kompromissu forte atu halo ho susesu peskiza ba minerais metáliku no naun metáliku durante periódu extensaun ba tinan 2.
Hodi fó susesu ba projetu ne’e, Sua Eselénsia Ministru Petróleu no Rekursus Minerais, Señor Prezidente ANM, I.P. apela kontribuisaun máxima husi komunidade no autoridade lokál no labele halo impedimentu, hodi tulun empreza halo mapeamentu no foti amostra, tanba hafoin finaliza Empreza sei submete realtóriu ba governu hodi avalia, hafoin hare possibilidade ba dezenvolvimentu ne’ebé sei tulun ekonomia nasional no lokál.
Reprezentante empreza Tivan Limited konsidera importante ba kontinuidade projetu ne’e ba dezenvolvimentu ekonómiku no empreza kompromete exekuta projetu ho responsabilidade, transparánsia, komprimentu ba normas existente no envolve komunidade iha exekusaun projetu. Tivan sei koopera ho Murak Rai Timor, MRT, E.P., hodi apoia dezenvolvimentu projetu ne’e, hodi reforsa dezenvolvimentu ekonómiku.
Tivan LDA mos responsável ba atividade prospesaun no peskiza ba minerais metáliku liu-liu liu-liu osan mean no riti mean, iha àrea konsesaun ho totál 344 km2, ne’ebé pertense ba Postu Administrativu Turiscai, Same, Fatuberliu no Alas iha Munisípiu Manufahi, Postu Administrativu Maubisse, Munisípiu Ainaro no Postu Laclubar iha Munisípiu Manatutu.