Sua Eselénsia Ministru Petróleu no Rekursus Minerais, Francisco da Costa Monteiro partisipa iha Egypt Petroleum Show (EGYPES) 2024 ne’ebé realiza ho patrosíniu husi Sua Eselénsia Prezidente Repúblika Árabe Ejipto, Abdel Fattah El Sisi. Eventu ho tema, Impulsiona tranzisaun enerjétika, seguransa no deskarbonizasaun, realiza husi loron 19 to’o 21 fulan Fevereiru iha Cairo, Ejipto.
Durante intervensaun iha painel dikussaun kona-ba “Garante Enerjia Sustentável no Assesível ba ema hotu” Sua Eselénsia Ministru Francisco Monteiro haklaken prespetiva Timor-Leste nian, kona-ba dezafiu no oportunidade iha seguransa enerjétika, garante ninia asesibilidade no mós sustentabilidade.
Eselénsia Ministru mos enfatiza importánsia atu avalia ho kuidadu, eskolla no adopasaun teknolojia foun atu dekaboniza seitór mina no gás. Nia mensiona mos katak, mistura enerjétika iha Timor-Leste domina husi hidrokarbonetu no la’os de’it papel gás natural, maibé hateke futuru ida ne’ebé enerjia solár no mos meius enerjia renovável seluk ne’ebé assume papel signifikativu ida.
Sua Eselénsia Ministru mos deskuti esforsu husi Timor-Leste iha lejislasaun ba atividades mineiras, hodi kategoriza minierais hanesan estratéjiku no krítiku, atu aumenta benefísiu husi kadeia valor hotu. Nia mos explika katak, objetivu atu dezenvolve indústria husi extrasaun ba refinaria no industrializasaun, hodi garante kresimentu sustentável no prosperiedade ekonómika.
Partisioasaun husi Sua Eselénsia Ministru Monteiro iha EGYPES 2024, haforsa komprimissu Timor-Leste nia, iha envolvimento parseiru estratéjiku no parte interessada husi internasionál iha abordajen tranzisaun enerjétika global no explorasaun ba dezenvolvimentu sustentável.
