𝐌𝐏𝐑𝐌 𝐀𝐍𝐔𝐍𝐒𝐈𝐀 𝐑𝐄𝐙𝐔𝐋𝐓𝐀𝐃𝐔 𝐓𝐄𝐍𝐃𝐄𝐑𝐈𝐙𝐀𝐒𝐀𝐔𝐍 𝐁𝐀 𝐄𝐗𝐏𝐋𝐎𝐑𝐀𝐒𝐀𝐔𝐍 𝐌𝐈𝐍𝐄𝐑𝐀𝐋

Sua Eselénsia Ministru Petróleu no Rekursus Minerais, Francisco da Costa Monteiro Kinta-Feira ne’e, anunsia rezultadu tenderizasaun mineral, ne’ebé organiza husi Autoridade Nasionál Minerais – ANM.IP.

Iha prosesu pré kualifikasaun Autoridade Nasionál Minerais rejista empreza konkorrente 14 husi Indonezia, Austrália, India, Singapura, Xina, inklui empresa nasionál 4 no selesiona empresa sia, maibé empresa 6 mak submete dokumentu no ekipa avaliadór selesiona empresa hat.

“Ekipa avalia empreza sira tuir termu referénsia, informasaun sira ne’ebé mak ita avalia iha prosesu ne’e, mak hanesan, kapasidade téknika empresa sira, kapasidade finanseira no programa empresa sira oinsá tane as konteúdu lokál, saúde no seguransa. Iha pre kualifikasau hare liu ba empresa sira nia esperiensia iha minerai.” Teniku Prezidente ANM.IP Rafael Denilson

Beacon Mineral Pty.Ltd, Estrella Resoruces Pty.Ltd, Iron Fortune R.P no Peak Everest Mining. Ldt ne’ebé sai vensedór promete rekruta Timor-oan, fornese formasaun hodi realiza peskiza no investigasaun iha Munisípiu Baucau, Lautem, Manatutu no Rejiaun Autónoma Oecusse.

“Ami laran haksolok prepara no hakat ba etapa esplorasaun. Iha faze esplorasaun sei foka ba kriasaun servisu, abilidade foun no oportunidade ba timor oan, inklui peskizador lokal no negosiu lokal” Promete Reprezentante husi empresa vensedora ba prosesu tenderizasaun.

Governu considera katak, anúnsiu rezultadu tenderizasaun hanesan momentu históriku no reprezenta esforsu bo’ot iha explorasaun minerais.

“Foin dahuluk iha halo explorasaun formal iha seitór mineral, iha seitor petroleu hahu kedas ona antes restaura independénsia, maibe iha explorasaun mineral seidauk halo desde tempu indonesia, tempu UNTAET” Tenik Sua Eselénsia Ministru Petróleu no Minerais, Francisco da Costa Monteiro.

Ba oin, Empresa vensedora sei kompleta kondisaun balun antes realiza prosesu peskiza no investigasaun durante tinan tolu to’o hat no rezultadu husi deskobrimentu sei hatama iha planu exekutivu nian, molok emite lisensa ba explorasaun mineral no metal ne’ebé waihira explora iha folin bo’ot iha merkadu internasionál, hodi apoia mos Timor-Leste nia ekonomia.

Anúnsiu rezultadu ne’ebé realiza iha Hotel Timor, partisipa husi Autoridade Munisípiu Baucau, Lautem, Manatuto, Rejiaun Autónoma Oecusse, veteranu no parseiru sira.